परब्रह्मगुरू श्री चिलेदेव हे दिनांक १५ ऑगस्ट १९२२ रोजी पन्हाळा तालुक्यातील जेऊर या गावी त्यांचा जन्म झाला. श्री चिले महाराज हे दत्तावतारी आहेत. त्यांची जन्मभूमी जेऊर असली तरी कर्मभूमी पैजारवाडीच राहिली. त्यांचे पुणे, धनकवडी येथील शंकर महाराजांशी सख्य होते. ते शंकर महाराजांना दादा असे संबोधत. सद्‌गुरू चिलेदेव हे दत्तावतारी अवलीया आहेत. सद्‌गुरू चिलेदेव समाजामध्ये वावरत असताना त्यांचा अलौकिकपणा हा प्रत्यक्षात काहीतरी खूप वेगळा आहे असे वाटत नसे. परंतु त्यांचे अवतार कार्य संपल्यावर त्यांच्या कार्याची जाणीव होऊन आता सर्वजण श्री क्षेत्र पैजारवाडी स्थित श्री चिले महाराज समाधी मंदिर येथे त्यांचे दर्शनासाठी धाव घेत आहेत.

श्री क्षेत्र पैजारवाडी येथे "श्री चिले महाराज समाधी मंदिर हे भव्यदिव्य कासवाकृती मंदिर उभे राहिले आहे. येथील वातावरण हे अतिशय प्रसन्न,आल्हाददायक आणि अध्यात्माने भारलेले असे आहे. मंदिरासोबतच भक्त निवास आणि दैनंदिन सुविधा उपलब्ध आहेत. मंदिरामध्ये ध्यानसाधनेची गरज लक्षात घेऊन ध्यानमंदिरेही उभारण्यात आली आहेत. सद्‌गुरू श्री चिलेदेवांच्या दर्शनासाठी फक्त महाराष्ट्र, गुजरात, कर्नाटक, आंध्रप्रदेश नव्हे तर देश-विदेशातूनही सर्वधर्मीय भक्तगण श्री क्षेत्र पैजारवाडीस भेट देत आहेत. येथे आल्यावर भक्तांना विलक्षण अनुभूती येते.

परब्रह्मगुरू चिलेदेव यांच्या प्रत्येक कृतीमागे गूढ अर्थ भरलेला आहे. त्यांचे जीवनकार्य, लीला आणि चमत्कार त्यांच्या अवतारीत्वाचे साक्षी आहेत. त्यांचे निर्वाण दिनांक ७ मे, १९८६ रोजी पुणे येथे होऊन ते ब्रह्मलीन झाले. पण आजही लाखो भक्तांना त्यांच्या कृपेची प्रचिती येत आहे.

श्री क्षेत्र पैजारवाडीस वर्षाकाठी अंदाजे ३० लाखांवर भक्तगण दर्शनास येत असतात. श्री क्षेत्र पैजारवाडी हे आधुनिक काळातील एक विलक्षण दत्तक्षेत्र आहे.